اليوم جا على بالي اكمل الجزء الثاني

لموضوع (( كيف تكتفين زوجك ))

لكن بصيغه مختلفه

وهالطريقه بترضي الازواج وبتعيشهم
بابراج عاجيه



مع ان البنود مو مرتبين لاني تعبت
وانا اكتب بس الاهم انكم تصححون
نظرتكم باني اصلط الحريم واخرب بيوتهم




بسم الله وعلى بركة الله نبدا

اهلك .. تخلين زياراتك لهم بالمناسبات
ومو هو اللي يوديك لاااء,,
يجي احد من اخوانك ياخذك ثم يرجعك


الاسواق ... لا تدورينها الا بالاعياد ومره وحده ومن محل واحد تاخذين كل طلباتك
انتي وعيالك وتخلصين بسرعه
ماتعطلينه ولا رجعتوا البيت
تشكرينه على انه ماقصر معاكم


الزواجات ..... لا تجيبين طاري عرس ولا فساتين وان كان زواج قريب
وما منه مفر لا يزيد ثمن الفستان عن خمس ميه مع مستلزماته وكرررريه
كم سنه زواجات قدااام ولا تطلبين غيره وتضايقينه
ولا تنسين تلبسينه له كمان عشان لايقول تلبسين للحريم وانا ماتلبسين لي
مع ان الحريم يمدحون وهو مايمدح
لكن احتسبيها عند ربك برضه زوجك جنتك ونارك


التماشي .... انسيها وخليه هو بس اللي يستانس مع شلل الاستراحات والبلوت
وطلعات البر او السفر للسياحه مع اصحابه

وانتي اجلسي مع عيالك ببيتك مستوره
على التلفزيون والسوني محد قدكم
وتحمدي ربك انك لقيتي رجال يضفك من بيت ابوك ويستتك بدل ماتنصفين لطوابير المتاخر نصيبهم


طلبات البيت .... لا تطلبين تصرفي بالموجود ودبري عمرك الين يفضى المصون
ويتذكر ان البيت محتاج اغراض وساعتها اختصريها حسب ميزانيته لا تكتبين طلبات تقص الظهر

وان كان عندك سواق الله لايهينك عاد روحي انتي جيبيهم اجل ليه جايب لك السواق


الاولاد .... انتي شوفي طلباتهم وساعديهم بدروسهم واشغلي وقتهم وسليهم
لان المسكين مشغول بعمله وماعنده لا الوقت والحيل لانه يهتم فيهم


الفواتير ... سدديهم انتي عندك الهاتف المصرفي وماله داعي تشغلينه بشئ
تقدرين تسوينه وانتي جالسه ببيتك


لا جا من عمله افتحي له الباب واضحكي بوجهه وقوليله هلا وغلا تو مانور البيت

وافرشي سفرتك وجلسي عيالك وخليهم سكتم بكتم عشان لا يزعجون ابوهم وهو ياكل

لا خلصوا الاكل خليهم يدخلون غرفهم
وجيبي قهوتك او شاهيك الاخضر
او الاحمر حسب مايفضل الملك الاسد


وشغلي التلفزيون على اي قناه فيها رياضه وخليك سكتم بكتم ان تكلم ردي عليه
وان ماتكلم تقهوي وانتي ساكته يمكن
تعبان او طفشان وماله نفس يتكلم


بالليل البسي القميص ابو عشره لان
احلى من العقد لباسه والمره الحلوه
لو تلبس خيشه بتحليها
ـــ> حيلة البخيل طبعا
وتزيني بالاحمر والاخضر ترى يموتون بالتلطخ
ومايحسون انك مره الا لا تشحمتي وتلطختي


وحطي عطر ابو فواكه لانه ارخص الموجود
وبمجرد يعرف انك اخترتيه لانه مو مكلف
بيحس انه رهييييب ـــــ> احساس واحد
بخيل اكيد
وحتى تكون الجلسه اكثر بسااطه

الصبح لا جيتي تقومينه لا تكلمينه
بس اشتغلي فيه تكبيس وهو بنفسه
بيبدا يتمغط ويتدحدر بعمره من وضع لوضع
عشان تطول مدة التكبيس

واذا تبينه يقوم على طول قوليله الاكل
على السفره اخاف يبرد الشاي
راح يقوم طيران لانهم يبجلون بطونهم

اذا جالستي صديقات او قريبات لا تجيبين
سيرته الا بكل خير واهم شئ
انك ماتعلمين انه يمنعك من الخروج
او انه بخيل او انه مقصر ببيته قولي
انا مااحب اشتري ومااحب روحات السوق
وقولي انه يقلي خليني اطلعكم
وامشيكم بس انا ارفض لاني بيتوتيه
واحب قعدة البيت

استري عليه فاي عيب تقع عينك
عليه وخلي العيوب كلها فيك
لانه جنتك ونارك
وانتي طز فيك مو مهم انك تكونين مرتاحه
اهم شئ هو وبس


اذا اكتشفتي خيانه سوي نفسك مو منتبهه
عشان لا يضيعون عيالك ولان الزوجه لابد ماتصبر اذا شافت غلط بزوجها وتكتفي بالصلاه فجوف الليل والدعاء له والاكثار من الاستغفار
وتقربي له وحاولي تعرفين اش اللي منفره منك ولا تقولين ماقدرت افهمه وماقصرت معاه لااكيد ان العيب فيك بس انتي حاولي ولا تياسي

اذا شفتيه يقعد عالنت لساعات طويله
وحاسه ان عنده خنبقه تجاهلي
الوضع ولا تفتشين وراه خليه يتمادى
بالغلط ولا تستنكرين عليه اي فعل
او غلط وبلاش شغل التجسس
لانه ما يجوز

ولان كل الرجال كذا ومصيره يطفش
ويمل ويعرف انه غلطان انتي بس ادعيله بالهدايه
وخليك مهتمه ببيتك وعيالك وصلاتك
وعطيه حقوقه كامله ولا تقصرين
عليه بشئ

يمكن .. يمكن ..يراجع نفسه
ويتغير ويندم


ويمكن تقوى علاقته بهالمواقع
واهلها وفتره وتلاقين وحده على
راسك ساعتها لاتزعلين لان من
حقه انه يتزوج ثانيه وثالثه ورابعه
وانتي لك انه يعدل معاك وان ماعدل
ربنا بيعوضك بالاخره وبيحاسبه على
تقصيره


لانه اكيد ماتزوج الا لانك مو كفو او انك
مقصره ومهمله بلبسك وتزينك وباشياء
احنا مانعرفها طبعا البيت اسرار

ولا تنسين الاهتمام بالمناسبات المهمه
مثل عيد زواجكم وتحضير احتفال يليق بهالمناسبه وهديه معتبره تليق بمقامه
حتى لو انه مايذكر هالتاريخ ولا فكر
يهديك اكسبيه انتي باهتمامك

واهله احترميهم وقدريهم وعامليهم
مثل اهلك حتى لو كان مايحب اهلك
ولا يزورهم انتي ارضي ضميرك امام
ربك وسوي اللي عليك


غير انه مطلوب التضحيات فحالة
المرض من اهتمام ورعايه وحنيه
بدل مايحنون عليه الاغراب وتنحسب
نقطه ضدك لان المستشفيات هالايام
فيها ممرضات
فيهن نغز وضحكاتهم روعه
وبياكلون الجو عليك

وان احتاج تبرع لاسمح الله
المفروض تكونين اول وحده يضحي
باعضاءه عشان يستعيد صحته وينكر
جميلك ويتزوج عليك وعادي منتي
اول وحده



وانا اقول ان اولها انك سكتي على كل اللي ذكرناه



طبعا مافيها كلام ان اللي تسوي هالاشياء راح ينبسط منها زوجها وبتكون حرمه ولا كل الحريم لكن تاكدي انك

مو انتي المره اللي يحلم فيها يالغبيه
سوري بس ذي الحقيقه


وراح تاكلين على راسك الى ان
تلاقين لك سرير بالمصحه النفسيه
ويمكن ماتلاقين لانه صعب تلاقين
اسره هالايام حتى بالمصحات
لكثرة الامراض والمرضى النفسيين

او جلطه تريحك من عالم الرق
والعبوديه بكامله بعيد الشر عنك
وهالمره بيتزوج عليك من اول مايخلص

عزاك بعد عمر طويل

ولا عزاء للسيدات


حسيت قولوني بينفجر
لمجرد اني كتبت هالحقائق
مساكين يالحريم لكم الجنه يارب


يالله فتكو بعافيه